شگلك اني احبك .. والله غلطان

بخدمتك عمي شنهي تريد بس كَول"" اجيب الي تريدة فصالة بالايد

واذا متريد كلشي كَول هم صار "" بخدمتك هم اجيب الكلشي متريد

مسح تحديد للكل اني سويت "" واسمك هم بقة تعداه التحديد

عدا صوتك نشاز باذني اي صوت "" وحتى الصرخة منك جنهة تغريد

نعم غيرك اكو حلوين وهواي "" لجن بس انت اصلي وهمه تقليد

ما اشتهي يوم احجي وي غيرك "" ولا تشتهي عيوني لغيرك اتشوف

تدري شكد لهفتي عليك يفلان "" بكد ضيم العراق عليك ملهوف

تسحكَ عالكَلب صدكني ماضوج "" بس اني علة مودك عايش بخوف

لان كَلبي درب وجروحي عثرات "" واخاف اطيح من تسحكَ بلا شوف

شكلك اني احبك والله غلطان "" لان حتى الاحبك ناقصة حروف

وصل حبي الك حد ماهو معقول "" بحيث انت وياي واني مشتاكَ

تشابكني وتشاقيني واشاقيك "" واصيح الله واكبر بسك فراكَ

ملك امشي على طولي وانت وياي "" ومن تبعد ادنكَ واخذ الراكَ

وبس انت عليك اتشخص الناس "" من كد ما حلو من بعيد تنباكَ

وصاير بوكَ بالحب هاي الايام "" لذلك ما اعوفك اخاف تنباكَ

واذا لا سامح الله بيوم باكَوك "" وداعا يا ضحك مرحبا يبجاي

كَبل ما اشوفك اني تولعت بيك "" وكَبل ما نلتقي سميتك هواي

ما افك باب بيتي شما يدكون "" وافكلك باب بيتي وانت ما جاي

واجيت وعركة صارت بين العيون "" عليك عيوني هاي تصد قبل هاي

اذا غثيتني يصير الصبح ليل "" واذا تضحكلي يشرد ليل دنياي

من تروح اصوم ويبدي رمضان "" ومن ترجع أأذن واشرب الماي

للشاعر

عبد الحسين الحلفي

ِ