حبيبي العراق

(حبيبي العرااااااااااااااااااق)


منت وحيد انت الشعب كله بشيعته وسنته.
منهو الكالك ناسيك هم ينسه الكمر وكته لو نبض الكلب يتنكر بدكته.
بس انت عشك مفضوح وعشك الناس كلهه مساتر وسكته.
صرت انت بت وبركبة يهودي هم شايف يهودي يجوز من سبته.
انت الفارس اليسبق هبوب الريح وما ظل خيل سابكته.
وانت اليرهم ترابك كحل للعين ودوة للماشفت علته.
ومن طينك نحني جفوف المعرسين وكل اصبع فرح من طينتك حنته.
وانت الريحة ترابك ترد الروح هيل وزعفران وعنبر بشمته.
ومثل تراب كاعك مالكينه تراب يرهم للصلاة من طينته تربته .


انت ينام بيك المرتضى الكرار أبو الحسنين الكلهه التلوذ بشارته وبخته.
وانت ينام بيك بكربلاء حسين الما بايع الطاغوت ودنك ركبته .
وانت البيك ظلت شارة العباس لمن طاح دنكلة الفرات وباسة من شفته.


من طلعت منك يوم طرني البين كلبي وياي ماجبته .
اثاريني نسيته هناك كلبي عندك أمنته.
شتلته بجرف دجلة الخير ومن سباح الشواطي شربك تبته.
وانت الدمع يجري بوسط ذيج الكاع وبماي الفرات ودجلة عمدته.
ولمن صار ينقل جدمه بين الناس أخذته وياي للكاظم على الشباك زورته .


صح لمن طلعت تأقلمت وية الغرب فد نوب وصرت ماصخ مثلهم والملح عفته .
وصح كمت أرطن رطنهم لمن يرطنون ولسان العرب بالاعجمي كسرته.
لكن لكن مدري شنهو يصير بيه من يمر طاريك أحسنك دفة تموز وسط شته.


العالم نسة يوم 11 من أيلول صارت بيك سالفته .
ناس تكول لازم نحتويك ونشفط البترول وناس تكول لازم نسرك بركته .
وناس تكول لازم هالحصار يدوم وناس تكول لازم ننزع أسلحته .
وناس تكول خطية أطفاله ماتوا من الجوع وناس تكول حيل وياه ماحمد ربه وشاكر نعمته .
جي انت حلو والدول منك تغار ما عدهم العندك من مجد ملته .
انت أول وطن ادم وضع جدمه عليه وكال يا الله لانك وصلة من جده.
وانت أول وطن حبه النبي ابراهيم ودعا ربه يصونه برحمته وعزته.
وانت اول وطن مرسه لسفينة نوح ونبي أيوب ناخت بيك راحلته.
وانت اول وطن علم العالم أبجدية ويكتب التاريخ وانت أول وطن للقانون سننته .
وانت أول وطن كالتله الشمس يمه صباح الخير ولو رادت تمسي تمسي يم كبته.
وانت أول وطن ما تشبه الاوطان مدري شلون ربك خلقك سبحان ربي شلون صورته.
صورته العراق وبس علينه يلوك واحنه نلوكله لمن يحل وكته .