لحظة انفجار ....تبجي الصخر

السلام عليكم

شلونكم حبايب

حبيت اقدملكم هاي القصيده

بس اتمنى منكم تقروهه بتركيز
*
*
*
*
*

غطه عزرائيل بجناحه المكان

ساعه سبعه

بين زاير للحسين وبين مسواك الزغار

هبط عزرائيل بجناحه المخيف

بعد ما أدى مراسيم الزياره وقره وارث

بلل اشفاه وْلهاته بْرشفه من ماي السبيل

أخذ خيره إبــــ باب عبا س الكفيل

ألخيره مو زينه

إوْيِباوع وين علْساعه القديمه

الساعه سبعه وعشره طب ساعي البريد

مْشكبن إبــــــ أطنان بارود وحديد

بْكل برود أعصاب إبِن عمه يزيد

سلَم الناس الرساله

إنفجار؟؟؟؟؟

الشوارع خذَت وضع الانبطاح

ليل ممتد على طوله

إطشرت نجماته بحلوك الضباع

إنفجار

بْعيني شفت آنه القميص يْمَلِش بْروحه

وْبقايه إردان تزحف علْرصيف

الرصيف تْشلبه حيطان الجوامع

والمناره تصيح حي إعلَََََ العراق

الله وْلَحد ماكو أحد

ماكو أحد

فقط عزرائيل واحلام العباد

وإنفجار

إلتفت عزرائيل فز بْوجهه نار

نار

لهب حركت زاويه بْجنحه اليمين

حاول إيطفيهه بجناحه اليسار

وراس لن طاح بْشليله

والعيون تكول حالوب بْحلك تنور حار

والجفوف مخاطف ورشكة اصابع

اصبع إبــ بصمة تقاعد

توه مستلم راتب

اصبع إبـــ بحنة السابع

بعد جا إلمن نعاتب

إنذهل عزرائيل مرسال الاله

صفك بيده

نكث راسه

وْعِدَلْ روحه

وْدِنَتْ نفسه ينطي صك اسمه الحياة

لْطفلة مرسومه إعْلَ حايط

لوحه من دم الحسين

والله لو شفتوا وجهه شْكد حنين

دهش مليانه عتاب

والرضيع البيد امه نْترست الممِيه والريه

دخان وْحليب

بالملامح بسمه للعيد الجديد

وامنية خرخاشه وكماط الانيق

وامه بشفاف الْكلتهه النار تنشغ

ادخيل ولدج فدوه يا ام البنين

والحسين بصوت ذب عكاله

ومفرفح يصيح

يا بو فاضل غادر المشرعه الان

سكينه يمي

احمي بابك

واركض الشارع ابوك

ريحة الطف وصلت الشباج اخوك

يا بو فاضل احمي ناسك

شيل جربت زادك وطفي الخيام

الدكاكين اختنك بيهه الحمام

كل عراقيه جريحه اليوم زينب

كل عراقي اليوم يا عباس بيه ريحة امام

ربع ساعه ربع ساعه

سكت تغريد البلابل

جمد تفكير الشوارع

ربع ساعه

الصمت غطه المكان

نفض عزرائيل جنحه

اخذ حصته وطار بحزام الامان

يا ملاك الموت يا عزرائيل مهلاً

وين رايح

ردلي ناسي

وحشه البيوت العفتهه تنحب بسد الجناسي

ردلي ضحكات الاطفال الخرمشتهه بناب قاسي

ردلي حلم الامهات بزفة القاسم ابنه

وين رايح

انجان رايح هاك اخذ لله الرساله

كله فيران السياسه

كرضت اشفاف المحنه

وكله غول الطائفيه

امشرع البيبان

دك نابه بمدنه

إولغت جمله حنينه

شكد سمعناهه وبجينه

( احنه مره نعيش مره نموت مره بكل عمرنه)

احنه ماعشنه

وصناعت موت كل مصباح عدنه

وماكو هدنه

كِلَه من اسمع صدى صوت انفجار

روحي تتشضه على الحيطان لوحة دم غريبه

ويفتر براسي سؤال؟؟؟

ليش ماعدنه حمامه

أو غزاله

أو فراشه

وْصوره الها بْكل مكان

إتقود مليشيا الجمال

ليش من دون الخليقه إبــ بابي اجت

جبهة قتال

ليش قاموسي انشطب من عنده مفردة

الترافه والدلال

الذبح عندي حرام

كلًه حرام

ودي الغي شكو ريحة لون للدم

بين اديه او حرف علْ ذبح يندهني تعال

حتى لو جان الذبح اسلامي وتكلي حلال

ياعراق شكد خطيه

من سنة ستين للهجره

اشوفن كربله بالناصريه

من سنة ستين للهجره

اشوف اجبال كردستان

جنها خيام زينب تحت قصف المدفعيه

ومن سنة ستين للهجره الزمن واكف

ملطخ بالدماء

امس لحظة ذبح شلال الدماء

ياعراق الطف جريح

ياكل بدم الذبيح

والالم جداً مريع جداً وكيح

والموت اسود ماكو بيه

يتسمى موت قاسي وموت يتسمى مريح

اهنا علي الاكبر جريح

والرضيع اهناك يم بصطيه

من نحره ذبيح

والمعاضد بعد ماتحتاج جف

من زند

مبتوره تتلولح تطيح

ياعراق شكد خطيه

ويه كل طرت فجر تنطي حسين

ويه كل هفتت شمس يصلب مسيح

رائعة نوفل الصافي

ـــــــــــــــــــــــــــــــــــــــــــــــــــــــــــــــــــــــــــ

[center][ندعوك للتسجيل في المنتدى أو التعريف بنفسك لمعاينة هذه الصورة]

[/center]

يسلمووو اخي الكريم على القصيده الجارحه

ودي

ـــــــــــــــــــــــــــــــــــــــــــــــــــــــــــــــــــــــــــ

[ندعوك للتسجيل في المنتدى أو التعريف بنفسك لمعاينة هذه الصورة]

شكرا هموني على هذا الابداع

متالق دائما بما تنشره

و على فكرة مبروك التوقيع الجديد كللللللش حلو

تحياتي وردة

راااائعه جداا القصيده هموني وصدك تبجي الصخر

شكرااا جزيلا لك حبيبي الغالي هموني

لاتحرمنا جديدك

تحيتي

يسلموو اخويه قصيده مذهله

ودي

عاشت ايدك هموني

والله بجتني لمن قريتها

يسلم قلم الشاعر

وتسلم اناملك لنقل هذا الابداع

تحيتي

ـــــــــــــــــــــــــــــــــــــــــــــــــــــــــــــــــــــــــــ

[ندعوك للتسجيل في المنتدى أو التعريف بنفسك لمعاينة هذه الصورة]
.
.

.

منورررررررررين

ـــــــــــــــــــــــــــــــــــــــــــــــــــــــــــــــــــــــــــ

[center][ندعوك للتسجيل في المنتدى أو التعريف بنفسك لمعاينة هذه الصورة]

[/center]

» انفجار يهز المنتديات::البوم((خضير هادي2009))
» حبيبي لا تبجي .... غزل x غزل
» ما هي أصعب لحظة بحياتك ؟؟؟؟؟؟؟؟
» حوار بين عاشقين لحظة فراق ......,
» صور زينب العسكري في مسلسلة لحظة ضعف